luns, 25 de maio de 2015

LIRIO, FLOR DE LIS




O socalco de bloques está a rebentar de formas e cores. Un auténtico cadro vivo. Xa abriron os lirios ou flores de lis. Paga a pena acercarse e ollar os pétalos cunha lupa, hai unha explosión cromática  única. Esta é unha variedade de xardín, da familia das iridiáceas, que poder florecer na gama das azuis, lilas, brancas ou amarelas.






Flores del Lirio Amarillo (Iris pseudacorus) Esta é unha variedade salvaxe que medra espontánea e ventureira en terreos húmidos e sombrizos. Chámanlle Iris pseudacorus. En Galiza coñécese como lirio amarelo e medra abundantemente en terreos asolagados por ríos, regatos e regueiros. E como nós estamos no país dos mil ríos, é doado atopala en primavera no seu hábitat.

Tamén plantamos bulbos nun dos xardíns interiores ao que se accede polo obradoiro, e estes tamén floreceron no medio do prado.

 A combinación cromática lila+amarela era moi estimada por Van Gogh, posiblemente reparou nela observando os manchos de lirios azuis e morados nos xardíns campesiños da  Provenza.

 
http://es.wikipedia.org/wiki/Lirios_(Van_Gogh) 

 E aquí deixamos un deseño baseado na flor de lis que foi moi utilizado na heráldica europea, sobre todo na francesa. Non é fermoso?




venres, 22 de maio de 2015

ABREN OS PRIMEIROS LIRIOS ORIENTAIS











  No socalco experimental feito con vellos bloques de cemento estase operando unha transformación prodixiosa grazas á colaboración dunhas sementes de chícharos e uns poucos bulbos...... e continúa,  porque están empezando a abrir os lirios morados que os deixamos esta fin de semana xusto a piques de.

FESTIVAL DA LINGUA 2015: A copla de maio




Sen dúbida, a gran aportación do alumnado este ano 2015,  foi ese arranque copleiro que percorreu as aulas de galego e chegou ata o escenario do salón de actos. No vídeo pódense oír unhas cantas coplas elaboradas polos de 2º da ESO,  seguindo a melodía da Carolina. 

Os de 1º da ESO non chegaron a tempo de cantalas no evento pero tamén realizaron coplas co tempo xusto de penduralas do maio. Algúns resultados xa están publicados no tirarrollas e outros están aínda inéditos, pendentes de ensaio xeral.

 


Aquí queda un avance en versos hexasílabos ao estilo do famoso poema de Curros musicalizado por Luís Emilio Batallán




Hai máis imaxes do evento no blog de Rosa Romero 
a quen agradecemos unha vez máis a súa entusiasta colaboración.
                    

martes, 12 de maio de 2015

VÍDEO CESTO MILCORES







CESTO MILCORES


O autor do cesto é Modou de 2º da ESO, que realiza este ano o segundo curso de cestería en papel de xornal os mércores pola tarde. El foi capaz de montar só, cunhas sinxelas explicacións previas, este prototipo de base cadrada. Quedoulle un pouco ondeante por cuestións técnicas que non imos pormenorizar, pero co acabado en cores o resultado dá para felicitalo. Noraboa, Modou!

PROGRESO DOS CULTIVOS. PRIMAVERA 2015




ALLOS: Están en terra desde o mes de novembro, pero faltoulles sol. Haberá que agardar polas calores da primavera para que acaben de madurar. Levantamos un e están moi pequeniños.




BRÉCOL: Preciosa planta lista para comer, algúns exemplares están florecendo e non tardarán en producir sementes para o ano.


Prenderon as sementes das CABAZAS ALARANXADAS botando dous enormes cotiledóns.


CHÍCHAROS, guisantes, ervillas. Algunhas plantas xa deron vaíñas e os grans recén collidos, crus, están deliciosos


LAVANDA, azaia, rosmariño. Moi arrecendente, é o primeiro exemplar desta especie aromática e medicinal que plantamos na horta. Está no redondel da maceira, ben protexido por pedras.



LEITUGA  E CEBOLAS: en pouco máis dun mes puxéronse así. Empezamos a levar leituga para casa e todos din que están moi boa. Queda por medrar a leituga negra e a xaspeada.




MORODOS: listos para comer




RAVOS: Completaron o seu ciclo moi rapidamente. Fíxose a sementeira no mesmo campo e desenvolveuse un prado sen problemas. Algúns exemplares xa están florecendo, deixarémolos para a semente.


TORMENTELO, tomiño. A mata que plantamos o ano pasado floreceu este ano por primeira vez. Aquí aparece rodeado de menta. 



ABONO ORGÁNICO que se foi facendo na composteira ao longo de todo o inverno.



luns, 11 de maio de 2015

AS VOLTAS QUE DÁ UNHA ESPIRAL


Podemos dicir, non sen certo alivio, que concluímos a primeira fase da espiral de plantas aromáticas. 
Polo de agora temos un bancal improvisado de dous niveis,  recheo con todo tipo de materiais procedentes da horta: ramallada, terróns, terra mesturada con abono, herba cortada co fouciño, herba picada co cortador de relva, algunhas pedras e pouco máis. O muro da base está integramente realizado con tella plana que nos deron Domingo e Pablo. 
A única planta firmemente enraizada é a xarxa, a partir dun esquexe do exemplar que plantamos o ano pasado. O resto de plantiñas: menta, tomiño, cilantro, néboda, ourego, están soamente ubicadas no lugar que van ocupar na espiral pero aínda en maceta,  para ver que tal se van adaptando. Agradecementos a Concha por conseguir exemplares tan fermosos e traérnolos. 
De aquí a fin de curso dános tempo obsevar como se produce a aclimatación ao sitio que lle demos a cada especie;  se hai problemas, poderemos facer os cambios necesarios ata que todo prenda como é debido. Están aínda por sementar as caléndulase o pirixel. O xenxibre está empezando a agromar no obradoiro. 

Parabéns e agradecementos a todo o alumnado e profesorado que colaboran neste experimento iniciado no outono 2014 e que todos cumpramos moitos máis!








martes, 5 de maio de 2015

BACTERIOGRAFÍA






                                Paisaxe bacteriana despois de secar a pel da cabaza.